士多啤梨

平時唔多食士多啤利，因為佷怕酸，當然食日本品種就唔同啦
不過今天見到超市，有幾盒士多啤利放了在箱子內，就好像棄嬰一樣，無價錢，又不是放在水果攤位，只得三盒在凍肉區，很奇怪，不過實在被佢的色相吸引着，它是來自美國的，去到收銀處比錢，原來十八元一盒，good，你睇下佢Ｄ葉新鮮到呢。。。，影相前愉食咗二粒。
好味

悠閒的一個下午 kenon

下午唔想去翠華食下午茶，港式　no way
咁係銅鑼灣行下行下，就去到依間


我地叫咗兩杯咖啡

杯面的圖案是我整的，

猿人襲地球，噢失手！

依杯好優雅，最啱靚女飲，好細杯，兩啖就冇晒啦！

好香咖啡味，有三粒咖啡豆，是凍的。

還有沙律同意粉，沙律蠻可以，不過意粉的茄汁很甜。

傾吓傾吓，係依度賴咗成個下午了。
是日消費１６０蚊

國金軒奶皇月餅

我唔鍾意食冰皮月餅，因為覺得唔好食，成舊好似溶咗的糯米池咁，就算食都只食芒果味，不過佢地好不仁，唔知係咪知我唔多like，成盒冰皮只係留番波羅特飲比我，個名都不知所謂，食落佢都唔覺有波羅味，只係覺得一ＰＡＴ嘢，不過我好有食德，我都食晒佢，不過另外一個仲係雪櫃等做化石，反而傳統的月餅我就食晒啦。

我鍾意東海棠的月餅包裝，無論紙袋同鐵盒都印有傳統的毛筆字，除了有點文化味外還感到節日的溫馨，好warm啊！四個月餅放在鐵盒內，坐無虛設，個鐵盒如果唔啱用，可以掉去環保收集處，即係比收買佬處理便可。

相反，國金軒的包裝實在叫人失望，成個包裝都感覺唔到中秋節的節日氣氛同人情味。
為何這麼不環保，這麼浪費，一盒八個小丁丁的迷你月餅，做乜比禁大個盒，除了用了硬咭紙外，盒面還要加上人做皮面，都唔知點同佢分類好，依個設計絕對突出唔到佢的品牌，燙金logo又唔清楚，個盒又重，佢口既包裝好似攞住盒人參海味，但一Ｄ都唔覺得有貴氣，國金軒唔記得依家佢盒係月餅，係中秋節送禮佳品，係盒標榜無防腐劑的奶黃迷你月餅，未食要放雪櫃，唔通連個盒放係雪櫃咩，個盒放係度都嫌佢阻地方。
不過好在個餅都幾好味，不過食餅時會個皮散晒，先食好奶皇．其實個盒同紙袋的呎寸都可以減一半，唔係大就係好。

叻沙 Laksa

自從係星加坡食過叻沙後，便念念不忘。回到香港經常去尋找我的最愛。
在香港試過好幾間打正招牌做星加坡菜的食肆，我覺得一試叻沙便知佢掂唔掂，雖說個人口味各有不同，但當同幾個志同道合的人一齊試菜之後，同聲叫唔掂，就係唔掂啦！前幾年金鐘food court有一單位買星加坡食品，下午茶餐雞叻沙或蝦叻沙連茶，只不過廿蚊，又平又正，真係超值，其實最緊要就係叻沙湯底，即使只得豆卜、牙菜、雞蛋，冇其他料也好味。但好可惜，food court裝修完之後，就唔見咗依個單位。
咁係環仔區食個三間，價錢由四十元至六十元一碗都食過，有些間直不知所謂，湯底完全唔掂。環仔同上環有間叫加東都好好味，不過華華話幾十蚊碗，得好少料，仲要係一隻蝦毛開邊，好似紙禁薄，貴咗D喎!佢話太古城個間好味，都係三十幾蚊，我話唔信，咁就呃咗一碗啦！佢打包咗一碗返公司比我食，好感動啊!真係好味喎。
我亦都同坡仔去過尖沙咀新港中心二樓食過叻沙，都係好味之選，而且都係三十幾蚊，但今年去已經又唔見咗。
上次係銅鑼灣世貿廣場二樓個間食，要八十元一碗，我係唔想食，因為我覺得佢好貴，但蕙蕙話好想食，咁就由佢，不過係唔好食，個湯唔掂。如果坡仔都有嚟食，一定叫佢回水。
不過我地依家都有個新煮意，就係自己煮。
坡族凡係有親朋戚友返港，必定叫佢地帶貨，原來香港一田百貨都有得買，不過好似要三十七蚊盒。
一盒夠三個人食

係好好味的湯底，自己買米線、豆卜、牙菜、蝦、烚蛋就得，好易煮。

德國寶榨汁機VS特福攪拌機

我同媽都唔多食生果口既，媽咪話要買榨汁機，咁啱Ｍilky送咗部德國寶榨汁機比我，念住慳番錢唔駛買，點知媽咪用咗幾次，就唔肯用
我都試過依部機，佢真係一Ｄ都唔smart，二個蘋果榨到好少汁，又要切細先入到管口，Ｄ渣又唔係好想食，仲要飛到周圍都係，好浪費，最重要係你歎完依杯果汁，你對住部機真係想殺咗佢，點解禁多嘢洗架，我以前都用過另一個類似的榨機汁，都要洗一輪，但果架機迷你Ｄ，靚仔Ｄ，有心機洗Ｄ，依架大機，我唔係好鍾意佢，我以為我懶，所以接受唔到佢，不過連老媽都睇佢唔上眼，所以佢就唔駛旨意得到我地歡心，媽咪仲將佢封盒打入冷宮。
不過，今時今日，我地差不多每天都飲一杯果汁啦，因為買咗一個好好用的攪拌機，可當榨汁機用，好方便，又可以食渣，很好用，最重要係好好好易洗，所以現在我地會買好多唔同的生果榨汁。Tefal你好靚仔添
哈哈Milky 仲睇中佢，都話要一部，用滙豐咭易償錢二百幾蚊，好正呀。